ENTZUTEGI NAZIONALAK POSTARI AGINDU DIO LAB-ek DEITUTAKO LARUNBATETAKO GREBA MUGAGABEAREN AURKAKO BERE JARRERA BEREHALA ETETEA

Ekainean jakitera eman genuen Posta Entzutegi Nazionalaren aurrera eraman genuela, greba egiteko eskubidea eta askatasun sindikala urratzeagatik. Otsaileko idatzi mehatxagarriengatik jo genuen auzitara. Gogoratu nola idatzi haietan, “enpresa-iritzia” itxurapean, Postako zuzendaritzak lantegi guztietan iragarri zuen, LAB-ek deitutako larunbatetako greba ilegala zela; eta nola, ondoren, grebalari bakoitzari ohartarazi zion, greba ilegalean parte hartzen zuten Postako langileen izenak kontuan hartuko zituela idatziz, RHUNID izeneko langileen lan-hutsegite gestio-sisteman.

Epaiketa irailaren 24ean egin zen, eta epaia aurriaren 5ean jaso genuen.

Epaiak oso garbi uzten du, larunbatetako greba mugagabearen aurkako Postaren jokaera guztiak greba egiteko askatasun eskubidearen eta askatasun sindikalaren aurkako urraketak izan zirela, eta Postari agintzen dio, grebaren aurkako bere jokaera berehala bertan behera utz dezala.

Epaia oraindik ez da irmoa, zeren eta bost eguneko epean kasazio-helegitea aurkez daiteke. Ez dakigu Postak helegitea aurkeztu duen ala hori egiteko asmorik duen, baina aurrez esan dezakegu epaiak, oso ondo eraikia, aukera gutxi uzten diola edozein helegiteri aurrera egiteko.

Epaiaren garrantziari dagokionez, oso argi utzi beharra daukagu pertsonal laboralari bakarrik dagokiola, eta ez duela baloratzen greba legezkoa den ala ez. Hala ere, Postari adierazten dio greba ilegaltzat hartuko balu “... enpresak lan-arloko jurisdikziora jo beharko du, epai-organoa izan dadin greba ilegaltzat, hala balitz, hartuko duena...”.

Ondorioz, langile laboralentzat greba guztiz legezkoa da

Langile funtzionarioei dagokionez, berriz, gogoratu Postak legezkoa ez zela aitortu zuela espresuki, EAG-ko administrazioarekiko auzi-aretoan errekurtsoa egina daukagun ebazpenaren bidez; eta oraindik frogaldian daukagu (Lekukoen froga azaroaren 16ean egingo da).

Prozedura honetan inpugnatutako ebazpenen kautelazko atzerapena eskatu genuen, bainau ukatu egin ziguten. Beraz, itxarotea beste aukerarik ez dugu.

AZKEN ORDUKO OHARRA: Auzitegi Gorenak ebatsitako lau sententzia jaso ditu LABek  eta denetan, Correosek egin zituen, larunbatetako banaketako langileen kaleratzeak ilegaltzat jotzen ditu.

Euskal-Herria 2012ko urriaren 10.